Ibinasura ng Department of Justice (DOJ) ang mga reklamong may kaugnayan sa excise tax laban sa mag-asawang kontratista na sina Sara at Curlee Discaya, matapos umanong makita ng mga piskal na may “makatwirang depensa” ang mga akusado.
Ayon kay Prosecutor General Richard Anthony Fadullon, ibinasura ang mga reklamo matapos ang masusing pagsusuri ng mga tagausig. Ang mga reklamong ito ay inihain ng Bureau of Internal Revenue (BIR) noong Oktubre 2025.
Ayon sa DOJ, ang mga reklamo ay may kaugnayan sa umano’y kabiguang magbayad ng excise tax ng mag-asawang Discaya para sa siyam na luxury vehicles na nakarehistro sa ilalim ng kanilang mga pangalan.
Samantala, sinabi ni DOJ spokesperson Polo Martinez sa hiwalay na pahayag na dalawa pang kaso ng tax evasion laban sa mag-asawa ang hindi pa naihahain sa Court of Tax Appeals (CTA).
Noong Enero 27, ibinahagi ni Martinez na limang kasong may kaugnayan sa buwis ang nareresolba na ng mga piskal, kung saan tatlo ang ibinasura.
Ang dalawang natitirang kaso ay inaasahang ihahain sa CTA. Kabilang dito ang mga umano’y paglabag sa Section 254 ng National Internal Revenue Code, na tumutukoy sa sinadyang pagtatangkang iwasan o dayain ang pagbabayad ng buwis, at Section 255, na may kinalaman sa sinadyang hindi pagbibigay ng tama at wastong impormasyon sa buwis.
