Nadagdagan ng P8.072 bilyon ang panukalang pondo para sa education sector sa 2027 matapos aprubahan ng Budget Amendments Review Subcommittee o BARSc ng House Committee on Appropriations ang mga budget realignment.
Sa ilalim ng Department of Education o DepEd, kabilang sa dagdag na pondo ang P500 milyon para sa School Safety and Security, P350 milyon para sa Academic Recovery and Accessible Learning o ARAL Program, at P952 milyon para sa Basic Education Facilities Fund.
May karagdagang pondo rin para sa Madrasah Education Program, Special Needs Education Program at Indigenous People Education Program. Sa kabuuan, P1.952 bilyon ang realignment para sa basic education.
Para naman sa Commission on Higher Education o CHED, P2.102 bilyon ang idinagdag para sa Tertiary Education Subsidy at P1.766 bilyon para sa Tulong Dunong Program.
Nadagdagan din ang pondo para sa University of the Philippines System at P456 milyon para sa Locally Funded Projects ng iba’t ibang State Universities and Colleges o SUCs.
Samantala, P1.44 bilyon ang inilaan para sa mga scholarship at training program ng Technical Education and Skills Development Authority o TESDA.
Ayon kay House Committee on Appropriations chairperson at Nueva Ecija Rep. Mikaela Angela Suansing, bahagi ito ng commitment ng Kamara na bigyan ng pinakamalaking budgetary share ang education sector.
