Nagdulot ng matinding pinsala ang isang malakas na buhawi sa Wisconsin, Estados Unidos matapos wasakin ang mga bahay, pabagsakin ang mga puno, at magdulot ng malawakang pagkawala ng kuryente.
Kinumpirma ng National Weather Service (NWS) na tumama ang buhawi sa Winnebago County, habang nagtamo rin ng malalaking pinsala ang mga komunidad sa Appleton, Menasha, at Fox Crossing.
Ayon sa mga awtoridad, maraming bahay ang nawalan ng bubong, may mga sasakyang natumba, at ilang gusali ang gumuho. Nawalan din ng kuryente ang buong lungsod ng Menasha na may humigit-kumulang 18,000 residente.
Sa kabila ng lawak ng pinsala, wala pang naitatalang nasawi o nasugatan. Patuloy namang nagbabala ang mga awtoridad sa publiko na umiwas sa mga apektadong lugar at mag-ingat sa mga natumbang puno at linya ng kuryente.
