Pinawalang-sala ng Sandiganbayan Second Division nitong Martes si Iloilo Representative at dating Health Secretary Janette Garin, kasama ang iba pang dating opisyal ng Department of Health (DOH) at Philippine Children’s Medical Center (PCMC), sa mga kasong katiwalian kaugnay ng pagbili ng ₱3.5 bilyong halaga ng bakunang Dengvaxia noong 2015.
Nag-ugat ang kaso sa alegasyon ng iregularidad sa pagbili ng bakuna para sa dengue immunization program ng administrasyon ni dating Pangulong Benigno Aquino III, kabilang ang umano’y ilegal na paglilipat ng pondo ng pamahalaan.
Sa kaniyang pahayag, ikinatuwa ni Garin ang desisyon ng anti-graft court at sinabing tagumpay ito hindi lamang para sa kaniya kundi para rin sa mga siyentipiko at eksperto sa pampublikong kalusugan na sumuporta sa programa ng pagbabakuna laban sa dengue.
Kabilang sa mga pinawalang-sala ang mga dating DOH undersecretary na sina Gerardo Bayugo at Kenneth Hartigan-Go, gayundin ang ilang dating opisyal ng PCMC.
Noong Oktubre 2023, nagsampa ang Office of the Ombudsman ng mga kasong graft at technical malversation laban sa mga opisyal dahil sa umano’y mga iregularidad sa procurement ng bakuna.
Gayunman, itinanggi ni Garin ang mga paratang at iginiit na inaprubahan ng Department of Budget and Management ang alokasyon ng pondo sa pamamagitan ng Special Allotment Release Order.
Naging kontrobersyal ang Dengvaxia noong 2017 matapos magbabala ang manufacturer na Sanofi Pasteur na maaaring tumaas ang panganib ng malubhang dengue sa mga nabakunahang indibidwal na hindi pa nagkakaroon ng impeksiyon ng dengue virus. Dahil dito, sinuspinde ng pamahalaan ang programa ng pagbabakuna na naglalayong protektahan ang mga mag-aaral laban sa sakit.
