Nilinaw ng Constitutional Law at Human Rights lawyer na si Atty. Domingo Cayosa na ang kasong isinampa ng International Criminal Court laban kay Senador Ronald “Bato” dela Rosa ay may kaugnayan sa crimes against humanity, kaya hindi umano naaangkop ang temporary immunity sa pag-aresto sa loob ng Senado habang may sesyon.
Sa panayam ng Bombo Radyo Cauayan, sinabi ni Cayosa na seryoso ang mga kasong kinahaharap ng senador, kaya tungkulin ng National Bureau of Investigation, Philippine National Police, at ng Executive branch ng pamahalaan na ipatupad ang anumang legal na warrant of arrest.
Ayon pa sa abogado, bagamat kumalas na ang Pilipinas sa Rome Statute, nananatili pa rin ang residual obligation ng bansa na makipagtulungan sa ICC bilang pagtalima sa mga kasong sinimulan bago pa man maging epektibo ang pagkalas ng bansa sa kasunduan.
Binigyang-diin din niya na may umiiral na pambansang batas, ang Republic Act No. 9851 o Philippine Act on Crimes Against International Humanitarian Law, Genocide, and Other Crimes Against Humanity, na naglalayong tukuyin at parusahan ang mabibigat na paglabag sa international humanitarian law, kabilang ang genocide, crimes against humanity, at war crimes.
Ayon kay Cayosa, malinaw sa ilang probisyon ng naturang batas na may kapangyarihan ang gobyerno na arestuhin at isuko sa tamang international tribunal ang isang indibidwal na nahaharap sa warrant of arrest kaugnay ng mga nasabing krimen.
Ipinaliwanag din niya na ang anumang protective custody o lockdown measure sa Senado para kay Dela Rosa ay pansamantala lamang upang malinawan ang legal na basehan ng pag-aresto, ngunit sa oras na mapatunayan ang bisa ng warrant, wala nang legal na kapangyarihan ang Senado upang pigilan ang pagpapatupad nito.
Dagdag pa niya, kung pipilitin ng Senado o ng sinumang opisyal na hadlangan ang implementasyon ng isang lehitimong warrant of arrest, maaari silang maharap sa kasong obstruction of justice, lalo na kung may kinalaman ito sa mabibigat na kaso.
