CAUAYAN CITY – Nagpalabas ng Executive Order si Mayor Bernard Dy para ideklarang special holiday sa Department of Education (DepEd) – Cauayan City kaugnay ng pagdaraos ng Gabay Guro Teacherfest 2019 sa Biyernes, June 21, 2019.
Ang Teachersfest ay bilang pagkilala at pagbibigay-pugay sa mga guro sa kanilang malaking ambag sa lipunan.
Tampok na aktibidad ang Gabay Guro Concert sa hapon ng June 21, 2019 sa F.L. Dy Coliseum at inorganisa ng isang malaking telecommunications company.
Sa naging panayam ng Bombo Radyo Cauayan kay Mayor Dy, sinabi niya na kasali sa concert ang mga guro sa mga bayan na sakop ng Metro Cauayan na kinabibilangan ng Cabatuan, Luna, Reina Mercedes at Alicia.
Kabilang sa mga artistang inaasahang magtatanghal ay ang mga tagasuporta ng Gabay Guro natulad nina Christian Bautista, Gabby Concepcion, Jaya, Jona Viray at Jason Abalos.
Bukod sa concert, ang iba pang isasagawang aktibidad sa Teacherfest 2019 ay mga training at seminar ng mga guro.
Ayon kay Mayor Dy, nagpapasalamat siya dahil sa Hilagang Luzon ay napili na sa Cauayan City isagawa ang taunang Gabay Guro concert.
