Ipinahayag ng Islamic Revolutionary Guard Corps (IRGC) ng Iran nitong Biyernes na ipinagbabawal ang paglalayag patungo at mula sa mga daungan ng mga kaalyado at tagasuporta ng Estados Unidos at Israel.
Ayon sa ulat ng state media, isinara ng IRGC ang Strait of Hormuz, isa sa pinakamahalagang ruta ng langis sa buong mundo, at nagbabala na ang sinumang magtatangkang dumaan ay haharap sa mahigpit na aksyon.
Tatlong container ships mula sa iba’t ibang bansa ang pinabalik matapos harangin ng navy ng IRGC.
Ang Strait of Hormuz ay dinadaanan ng halos 20% ng pandaigdigang suplay ng langis, kaya’t ang pagsasara nito ay may malaking epekto sa pandaigdigang merkado ng enerhiya.
Ang hakbang ng Iran ay nakikita bilang tugon sa patuloy na tensyon sa Gitnang Silangan, partikular sa ugnayan nito sa Israel at Estados Unidos.
Ang naturang Strait ay makitid na daanan sa pagitan ng Persian Gulf at Gulf of Oman, na nagsisilbing pangunahing ruta para sa mga tanker ng langis mula Saudi Arabia, UAE, Kuwait, at iba pang bansa.
Noong mga nakaraang taon, ilang beses nang nagbanta ang Iran na isara ang daanan bilang tugon sa mga sanction at military presence ng US sa rehiyon.
Ang kasalukuyang krisis ay inaasahang magdudulot ng pagtaas ng presyo ng langis at gas, at maaaring makaapekto sa supply ng enerhiya sa Asya, Europa, at iba pang rehiyon.
