Nagbabala ang International Monetary Fund (IMF) na ang watak-watak na sistema ng financial infrastructure sa Pilipinas ang isa sa mga dahilan kung bakit mas mataas ang singil sa mga retail transaction fee ng mga Pilipino kumpara sa mga kalapit na bansa sa Asya.
Dahil dito, binigyang-diin ng institusyon ang pangangailangang ayusin ang sistemang ito bilang paghahanda sa posibleng pagbuo ng isang lokal na digital currency.
Sa inilabas na ulat ng IMF, nakasaad na nag-uugat ang problema sa hindi pagtutugma ng mga payment network at pamantayan sa bansa, na humahadlang sa maayos at mabilis na pagpapadala ng pera.
Dahil dito, ang mga bangko at iba pang mediators sa pananalapi na gumagamit ng hiwalay na system ay napipilitang ipasa sa mga consumer ang dagdag na gastos sa kanilang operasyon.
Isang malinaw na halimbawa ng kakulangang ito sa efficiency ang ugnayan ng dalawang pangunahing automated clearing house sa bansa. Ang mga transaksyon sa pagitan ng PESONet at InstaPay ay nangangailangan pa ng magkahiwalay na operator, ang BancNet, Inc. at ang Philippine Clearing House Corporation (PCHC) na nagreresulta sa mas mataas na cross-settlement fee at, sa huli, mas mahal na singil sa mga gumagamit.
Samantala, libre ang maliliit na person-to-person transfer sa mga karatig-bansa gaya ng PayNow sa Singapore. Sa Pilipinas naman, karaniwang naniningil ang mga bangko ng ₱10 hanggang ₱25 kada transaksyon gamit ang InstaPay, at maaari pang umabot sa ₱500 ang singil para sa mga corporate client.
