Nanawagan ang Pilipinas para sa mas mabilis at mas madaling access sa climate finance upang mapalakas ang kakayahan ng mga pambansa at lokal na institusyon na protektahan ang mga komunidad laban sa pagbaha, kakulangan sa tubig, pagguho ng baybayin at iba pang panganib na dulot ng climate change.
Sinabi ni Climate Change Commission (CCC) Vice Chairperson Robert Borje na hindi lamang dapat nakabatay sa laki ng pondong ipinapangako ang pagsusuri sa climate finance kundi maging sa kung gaano ito kadaling ma-access at magamit upang maprotektahan ang mga tao, kabuhayan at kalikasan.
Sa ginanap na 2026 Forum ng United Nations Framework Convention on Climate Change Standing Committee on Finance (UNFCCC SCF) sa Sydney, Australia, iginiit ni Borje na dapat nakabatay ang pagpopondo sa panganib at pangangailangan ng mga bansa at hindi lamang sa posibilidad ng kita.
Ayon sa CCC, tinatayang mangangailangan ang mga developing countries ng pagitan ng $310 bilyon hanggang $365 bilyon kada taon para sa climate adaptation pagsapit ng 2035. Gayunman, umabot lamang sa $26 bilyon ang international public adaptation finance na naipagkaloob noong 2023.
Tinukoy ni Borje ang tatlong pangunahing prayoridad ng Pilipinas: mas malinaw at pare-parehong accounting ng climate finance, mga financial instrument na angkop sa pangangailangan ng mga proyekto, at mas pinahusay na access para sa mga pambansa at lokal na institusyon.
Nanawagan din siya na pasimplehin ang mga rekisito at magbigay ng tuloy-tuloy na suporta sa mga institusyong naghahangad makakuha ng climate financing.
Aniya, maraming institusyon sa mga developing country, kabilang ang Pilipinas, ang nahihirapang matugunan ang mga kinakailangan sa accreditation, project preparation at approval dahil sa limitadong teknikal at pinansyal na kakayahan.
Sa naturang forum, itinulak din ng Pilipinas ang pagkakaroon ng iba’t ibang uri ng financing na babagay sa magkakaibang pangangailangan sa climate adaptation at mitigation.
Ang Climate Change Commission ang pangunahing ahensiya ng pamahalaan sa pagbuo ng polisiya kaugnay ng climate change at nangangasiwa sa koordinasyon at pagsusuri ng mga programa ng gobyerno sa ilalim ng Republic Act No. 9729.
