Pinuri ng Director-General ng World Health Organization (WHO) na si Tedros Adhanom Ghebreyesus ang Uganda dahil sa mabilis at maayos nitong pagtugon sa Ebola outbreak na nagmula sa kalapit na Democratic Republic of the Congo (DRC).
Sa kanyang pagbisita sa Uganda, sinabi ni Tedros na kumpiyansa siyang makokontrol ang pagkalat ng sakit kung magpapatuloy ang pakikipagtulungan ng Uganda sa DRC sa pagsugpo sa epidemya.
Ayon sa WHO chief, naging epektibo ang border screening ng Uganda sa pagtukoy ng mga kaso mula sa DRC. Aniya, maayos ding gumagana ang surveillance, testing, at case management systems ng bansa.
Gayunman, hinikayat ni Tedros ang Uganda na muling pag-isipan ang pagsasara ng hangganan nito sa DRC. Aniya, nakaaapekto ito sa ekonomiya at kalakalan, habang wala namang sapat na ebidensiyang nagpapakitang nakatutulong ito sa pagpigil sa pagkalat ng Ebola.
Kapwa nagdeklara ng Ebola outbreak ang DRC at Uganda noong Mayo 15. Ang kasalukuyang outbreak ay dulot ng bihirang Bundibugyo strain ng Ebola, na wala pang aprubadong bakuna o lunas.
Batay sa datos ng Africa Centres for Disease Control and Prevention (Africa CDC), umabot na sa 544 ang kumpirmadong kaso ng Ebola sa DRC, kabilang ang 88 nasawi. Sa Uganda naman, 19 na kaso ang naitala at dalawa ang namatay dahil sa sakit.
Nagbabala rin ang mga eksperto na maaaring lumala ang krisis sa kagutuman sa DRC dahil sa pagkalat ng Ebola. Sa kasalukuyan, halos 27 milyong mamamayan sa bansa ang nakararanas ng matinding kakulangan sa pagkain.
Patuloy namang pinahihirapan ng armadong kaguluhan sa lalawigan ng Ituri, na sentro ng outbreak, ang mga pagsisikap na makontrol ang pagkalat ng sakit.
