CAUAYAN CITY – Arestado ang isang estudyante matapos na magshoplift sa isang malaking mall dito sa lungsod ng Cauayan.
Ang pinaghihinalaan ay si alyas Nicky, 18-anyos, 1st year college at residente ng Alicia, Isabela.
Sa nakuhang impormasyon ng Bombo Radyo Cauayan sa Cauayan City Police Station, lumalabas sa imbestigasyon ng pulisya na naka monitor ang lady guard sa entrance nang tumunog ang Radio Frequency Identification (RFID) gate sensor nang lumabas ang suspek.
Agad naman umanong kinausap ng ladyguard ang suspek upang masilip ang laman ng kanyang bag at doon nakita ang dalawang pantalon na galing sa kanilang store.
Dahil dito ay hiningan siya ng resibo ngunit walang maipakita ang suspek kaya doon na nakumpirma na shinoplift nito ang dalawang pantalon sa kaniyang bag.
Sa kabuuan ay umabot sa P2,480 ang halaga ng gamit na tinangkang ipuslit ng pinaghihinalaan.
Agad namang inimbitahan ng ladyguard sa investigation room ang suspek habang vine-verify sa cctv ang pangyayari.
Nang makumpirmang nag-shoplift ito ay agad siyang ipinasakamay sa Cauayan City Police Station.
