Kinumpirma ni Office of the Vice President (OVP) Assistant Secretary at Assistant Chief of Staff Lemuel Ortonio na kasama siya ni special disbursing officer Gina Acosta sa pag-encash ng mga tseke para sa confidential funds.
Sa ika-18 araw ng impeachment trial ni Vice President Sara Duterte, sinabi ni Ortonio sa kanyang testimonya na siya lamang ang kasama ni Acosta sa apat na pagkakataong nag-encash ito ng tig-P125 milyong tseke sa LandBank Shaw Boulevard branch.
Ayon kay Ortonio, sumama siya kay Acosta sa bangko dahil hiniling ito ng OVP special disbursing officer. Gayunman, hindi niya makumpirma kung alam mismo ni Duterte na kasama niya si Acosta sa pag-withdraw ng pondo.
Ang apat na tseke ay na-encash mula Disyembre 2022 hanggang Hulyo 2023, na may kabuuang halagang P500 milyon.
Nauna nang idineklarang hostile witness si Ortonio ng Senate impeachment court matapos niyang aminin na maaari siyang mawalan ng trabaho kapag ma-impeach at matanggal sa puwesto si Duterte dahil coterminous sa termino ng bise presidente ang kanyang appointment sa OVP.
