Tabla ang kampo ni Israeli Prime Minister Benjamin Netanyahu at ang oposisyon na pinamumunuan ni Gadi Eisenkot sa halalan sa Israel, batay sa mga exit poll nitong Martes, Oktubre 27.
Walang nakakuha sa dalawang kampo ng kinakailangang 61 puwesto upang makontrol ang 120-seat Knesset o parlamento, kaya posibleng humaba ang negosasyon sa pagbuo ng bagong pamahalaan.
Bagama’t nagpakita ng malaking hamon sa koalisyon ni Netanyahu ang resulta, hindi pa rin malinaw kung sino ang makabubuo ng mayorya. Posible ring manatili si Netanyahu bilang caretaker prime minister habang nagpapatuloy ang negosasyon.
Naitala naman ang 77.7 porsiyentong voter turnout, ang pinakamataas sa mahigit dalawang dekada.
Ang halalan ang unang pambansang botohan sa Israel mula nang ilunsad ng Hamas ang pag-atake noong Oktubre 7, 2023, na sinundan ng mga digmaan sa Gaza, Lebanon at Iran.
