Paiigtingin ng mga awtoridad ang pagpapatupad ng paggamit ng outer lane para sa mga tricycle at iba pang slow-moving vehicles sa mga pangunahing kalsada ng Santiago City.
Sa panayam ng Bombo Radyo Cauayan kay PMAJ Melchor Acosta Aggabao Jr., Acting Chief ng Traffic Enforcement Unit (TEU), sinabi nito na nakipag-ugnayan na sila sa mga presidente ng Tricycle Operators and Drivers Association (TODA) upang mas mapalakas ang koordinasyon sa implementasyon ng naturang patakaran.
Ayon kay PMAJ Aggabao, bubuo ng group chat na kinabibilangan ng TEU at mga lider ng TODA upang mapadali ang komunikasyon at agarang matugunan ang mga isyu sa kalsada.
Layunin nitong matiyak na mananatili sa outer lane ang mga tricycle, lalo na sa mga four-lane at national highways sa loob ng lungsod, upang maiwasan ang pagsisikip ng daloy ng trapiko.
Gayunman, aminado ang opisyal na nagiging hamon sa pagpapatupad ang mga nakaparadang sasakyan sa outer lane, na nagiging dahilan upang mapilitang pumagitna ang mga tricycle.
Dahil dito, nagsasagawa na ng clearing operations ang mga awtoridad upang alisin ang mga sagabal at matiyak ang tuloy-tuloy na daloy ng trapiko.
Dagdag pa niya, nakikipag-ugnayan na rin sila sa Department of Public Order and Safety (DPOS) upang suportahan ang mga hakbang sa pagpapatupad ng mga regulasyon sa kalsada.
